Tratra ny polisy omaly tany amin’ny distrikan’i Soalala ilay tovolahy 20 taona namono nahafaty tovolahy namany 30 taona, tany Tsinjorano Besalampy. Ny herinandro lasa iny no nitrangan’ny famonoana raha ny vaovao voaray ary resaka lonilony no nahatonga ny loza. Nifamaly ireto  roalahy ireto, ny tendrom-po moa tsy mba namana ka nitarika ilay iray ho nikasy tanana . Nandositra niala ny tanàna kosa ity farany raha vao hitany fa maty ilay nifandrina taminy. Nampandre ny polisy sady nametraka fitoriana an’ilay nahavanon-doza ny havan’ny maty ka nisy ny fikarohana natao. Tsy niherina kosa anefa ny andro dia tratra ilay tovolahy. Nahatratrarana ody gasy maro be teny aminy nandritra ny fisamborana azy, araka ny vaovao voaray hatrany. Niaiky ny heloka vitany ilay tovolahy nandritra ny famotorana.

L.N