Tsy tontosa araka ny efa nandaminana azy ny fankalazana ny faha-54 taonan’ny polisim-pirenena tany Maroantsetra, ny alarobia lasa teo. Polisy iray 53 taona am-perinasa mitondra ny laharam-boninahitra « brigadier » no namoy ny ainy tampoka. « Tonga tao amin’ny biraon’ny kaomisaria izy ny maraina, tokony ho tamin’ny dimy. Nitambotsitra tampoka teo, raha efa niomana ny handeha hitarika ny hetsika ara-panatanjahan-tena hisantarana ny fankalazana », hoy ny vaovao azo avy any an-toerana. « Fijanonan’ny fo tampoka no nahafaty azy », hoy kosa ny fanazavana azo avy amin’ny dokotera, nandray an-tanana azy, avy ao amin’ ny hopitalin’i Maroantsetra. Noho ity voina ity, natsahatra ny fankalazana izany fetin’ny polisim-pirenena izany, mba ho fanajana ny maty sy ho fiara-miory amin’ny fianakaviany.