Efa hananika any amin’ny dimampolo any ireo olona marary mafy ao amin’ny hopitaly Csb Ambatoafo, distrikan’i Sambava amin’izao fotoana izao, raha ny vaovao voaray avy any an-toerana. Tombanana avy tamin’ny fihinanana trondro « sardines » izay nalaina tany Sambava tamin’ny talata lasa teo no anton’izany. Zaza, tanora hatramin’ny olon-dehibe no fantatra fa malemy, mandoa ary mivalana any an-toerana.

Very hevitra tanteraka ny sefon’ny Csb manoloana izao trangan-javatra izao. Miantso vonjy amin’ireo tompon’andraikitra ara-pahasalamana any Sambava ireo mpitsabo any Ambatoafo mba hitadiavana vahaolana haingana fa ahiana ny mety hahafaty ireo olona ireo raha tsy misy ny fandraisana an-tanana haingana. Fantatra ihany koa fa efa tsy mahazaka ireo marary intsony io toeram-pitsaboana io ka ilaina ny famindrana ireo olona ireo.

Roa hafa maty tany Toliara

Tsy fantatra mazava na sakafo lany daty na koa tena fanampoizinina tsotra izao fa tovolahy roa no namoy ny ainy tany Toliara ny fiandohan’ity herinandro ity. Nisotro toaka tao amin’ny « bar » niaraka tamin’ireo namany izy roa ireto, ny alahady teo, ka trondro anaty boaty no natao tsaky. Ny alatsinainy teo anefa dia narary mafy ireo telo lahy niara-nisotrosotro ka nampidirina hopitaly haingana. Tsy niala nenina akory ireo mpitsabo fa namoy ny ainy ny iray tamin’ireto tovolahy. Ny namany iray indray maty ny alarobia teo ary mbola miady amin’ny fahafatesana kosa ny fahatelo tamin’izy ireo.

Laurena Nany