Roa taona aty aoriana, niakatra fitsarana teny Anosy omaly ny raharaha famonoana sy fandorona teratany frantsay sy italiana ary malagasy, tany Nosy Be ny volana oktobra 2013. Ny fiampangana ny loholona teo aloha, Joseph Yolande, ho nitarika ny vahoaka hanao fitsaram-bahoaka – tamin’ny filazany ny tsy fandraisana andraikitry ny fanjakana manoloana ny famonoana ho faty tamin’ny fomba feno habibiana an’ilay zazalahikely 7 taona – tamin’iny fotoana iny dia nohenoin’ny fitsarana ambaratonga voalohany izy.

Nandà izany fiampangana izany ity loholona ity ary nohazavainy tamin’ny mpitsara fa nandamina ny raharaha no nitenenany tamin’ny onjam-peo iray tany an-toerana.  Ankoatra io senatora io dia olona voampanga miisa 6 ihany koa no nohenoin’ny mpitsara. Ireto farany izay voalaza fa nitora-bato sy nandroba ny fonenana sy ny tobin’ny zandary ary ny biraon’ny Air Madagascar. Nandà ny fiampangana azy ireo avokoa ireo olona ireo. Tsy nisy niaiky fa nandray anjara tamin’izany korontana izany izy rehetra. Hitohy rahampitso ny fandaharana ary efa tonga rahateo ireo zandary roa anisan’ny voampanga.

Laurena Nany