Olona fito no indray matin’ny lozam-pifamoivoizana teny amin’ny lalam-pirenena Rn31, tao Andampiely, fokontany Ambatinifoko, kaominina Antsahabe, any amin’ny distrikan’i Antsohihy, ny 6 oktobra lasa teo, tokony ho tamin’ny 12ora sy sasany. Fiara minibus mpitatitra olona manao zotra Bealanana sy Antsohihy ity tra-doza ity.

Noho ny fandehanana mafy dia nidona tamin’ny rindrin-tany ilay fiara ary nivadika ambony ambany avy eo. Vokany, olona dimy maty teo no ho eo, ny roa hafa namoy ny ainy tany amin’ny hopitaly ary zazavavikely 12 taona ny iray tamin’izy ireo. Mpandeha miisa 10 kosa naratra mafy, ao ny tapaka tanana sy tongotra, eo ihany koa ireo vaky loha izay efa manaraka fitsaboana eny amin’ny tobim-pahasalamana amin’izao fotoana izao.

Milaza tsy hipetra-potsiny manoloana ny voina mahazo ireo havany kosa ireo manam-pahoriana amin’ity loza ity. Efa mateti-pitranga loatra, araka ny vaovao voaray, ny lozam-piarakodia amin’iny lalam-pirenena iny noho ny setrasetran’ireo mpamily. Efa fanindroany tamin’ny lozam-pifamoivoizana tamin’ity herinandro ity io nitranga io.

Laurena Nany