Soa fa nijanona ilay fiara vaventy fa raha tsy izany dia efa fatin’ilay tovolahy no nosokirina tao ambaniny , omaly atoandro, tany Toamasina. Nandeha mafy be nanaraka ny lalana Boulevard Augagneur hivoaka  any Tanamakoa iny ilay tovolahy no nianjera ny kodiaran-droa nentiny ary nikorisa tao ambany kamiao iray  nijanona teo amin’ny sisin-dalana. Saika fisaka tao ambany kodiaran’ilay fiara ny lohan’ilay tovolahy raha nisy kely, araka ny vaovao voaray. Tsy afa-nihetsika intsony hany ka voatery nesorina moramora izy. Tsy nahitana ratra ety ivelany fa vetivety teo dia nivonto be ny tarehan’ilay tovolahy. Ahiana ho ratra anatiny no mahazo io niharan-doza io raha ny fahitana azy. Nifamonjena nentina haingana tany amin’ny hopitaly ity tovolahy mba hahazo fitsaboana.