Tsy kely lalana ny mpanao ratsy. Mila mitandrina ny rehetra amin’ireny milaza ho fikambanana manampy ny sahirana ireny fa indrindra ireo avy any ivelany. Marary indray no lasibatra  teto an-drenivohitra vao tsy ela akory izay. Nanatona mpitsabo iray amin’ny tobim-pahasalamana ilay marary ary rehefa nozahana dia mila fandidiana, hoy ny mpitsabo. Nilaza anefa ilay marary fa tsy manana vola hanaovana izany satria avy amin’ny fianakaviana sahirana. Nanambara ilay dokotera fa misy fikambanana avy ivelany miantoka ny olona sahirana any mandray an-tanana ny lany rehetra amin’ny fandidiana azy raha vonona izy.

Rehefa vita anefa izany dia vao maika nihombo ny aretiny taty aoriana. Tsy niverina tany amin’ilay mpitsabo intsony izy ireo fa niova hopitaly hialana nenina farany. Gaga ny fianakaviana raha nilazan’ilay mpitsabo fa tsy ampy voa iray intsony ilay marary. Tsy zakan’ity farany intsony ny aretina ary tsy tana ny ainy avy eo. Nitory ilay dokotera sy ilay fikambanana ny fianakavian’ny maty. Andrasana ny ho tohin’ny raharaha.

Laurena Nany