Tsy an-kiato ny loza ateraky ny môtô mitrifana eto an-drenivohitra. Ny alakamisy alina teo, ohatra, dia kodiaran-droa iray nentina tovolahy 29 taona no nifatratra tamina fiara iray, teny amin’ny 67ha vokatry ny fandehanana mafy. Vaky ny lohan’ilay tovolahy nitondra môtô vokatr’izany ary tsy nisy noraisina ilay kodiaran-droa. Ilay mpamily fiara kosa nentin’ny mpitandro filaminana natao famotorana.

Loza iray hafa ihany koa niseho teny Andavamamba. Raim-pianakaviana efa 50 taona mahery no nazeran’ny môtô nentiny. Avy nisotro toaka io rangahy io, araka ny loharanom-baovao. Fantatra fa ny lalana digy sy Andavamamba iny no tena matetika hitrangana loza ateraky ny môtô, indrindra fa amin’ny alina. Mampitombo ny gaboraraka ary mampirongatra ny loza ny tsy fisian’ny marika famantarana eny amin’ny arabe natao ho an’ny mpandeha an-tongotra ka samy manao izay tiany ny rehetra. Ankoatra izay dia mpitondra ireny skotera ireny no tena tsy manaja ny lalan’ny fifamoivoizana ka miteraka loza hatrany, ka tokony andraisan’ny fanjakana sy ny mpitandro filaminana fepetra.

L.N