Noho ny fitrandrahana volamena tsy nahazoana alalana dia olona miisa 24 no naiditra am-ponja vonjimaika nanomboka ny talata teo, ka  vehivavy ny iray. Miisa 56 izy ireo no niakatra fitsarana tamin’izany fa ny 24 notazamin’ny fitsarana. Efa nomen’ny Fanjakana fe-potoana ireo mpitrandraka ary navoaka tao anaty kariera fa mbola niverina ihany.

Efa fanintelony no nisy kariera vaky tany amin’iny tapany atsinanan’Ambatondrazaka iny. Tany Didy ny voalohany, ny taona 2012, faharoa tany Andilamena, ny taona 2014 ary izao any Ankosy izao indray. Samy ao anatin’ny faritra arovana Ankeniheny-Zahamena avokoa izy ireo, any amin’ny kaominana Miarinarivo, ary miteraka hatrany ny fanimbana ny ala sy ny zava-manan’aina. Voalaza fa ny vatosoa “rubis” no tena trandrahin’ireo mpandroba ny harena voajanahary ireo. Misy ireo mirotsaka an-tsehatra mivantana amin’ny fitrandrahana ary tsy vitsy ihany koa ireo manakarama olona amin’izany. Tonga any an-toerana ihany koa ny mpividy vatosoa am-polony, Tailandey, Sri-lankey, indrindra fa ny Afrikanina.

Hatreto anefa dia ireo mpangady ny volamena any ambanivohitra ihany ireo nogadraina ireo ka mampametra-panontaniana ireo olona any an-toerana ny momba ireo mpitrandraka lehibe sy mpividy ary mpanakarama.

Laurena Nany