Mahazo vahana ny vaky trano any Miadanandriana sy ny manodidina, any Manjakandriana. Manararaotra ny tsy maha eo ireo tompon-trano ny olon-dratsy ka miditra an-tsokosoko ao an-trano, ary amin’ny andro atoandro foana no isehoan’izany. Tokantrano iray izao no fantatra fa efa in-telo no nisy namaky. Raha ny fitantaran’ny tompon-trano, ny taona 2013 iny no nisy nangalatra voalohany tao aminy ka lasa tamin’izany ny akoho amam-borona rehetra izay nihidy tao am-pisoko. Ny faharoa, ny volana septambra 2015, ka nanjavona tao an-trano ny finday sy ny poketra fitoeram-bola miisa 2 sy ny vola ary zavatra madinidinika. Ny faran’ny herinandro teo no nitrangan’ny halatra fahatelo, raha nandeha  nandevina ny tompon-trano ka najifa ny “lecteur sy ny commande”, “subwoofer”, “radio” ary fahitalavitra. Misy alika miambina ihany ny tanàna, araka ny filazan’ny lasibatra fa tsy mahatohatra ireo olon-dratsy hanao ny asa ratsiny.