Tovolahy iray 23 taona tsy salama saina no namoy ny ainy, ny alakamisy lasa teo, teny Ambohitrimanjaka, rehefa niharan’ny fitsaram-bahoaka. Niditra tao an-tranon’olona tao an-tanàna izy io, araka ny vaovao voaray, ka noheverin’ny tompon-trano fa mpangalatra. Izy rahateo tsy nahita navaly rehefa nohadihadiana tamin’ny antony nidirany an-tranon’olona tao. Nodarohan’ny tompon-trano ho faty izy noho izany. Teo ihany koa ny manodidina izay nanampy nanao fitsaraham-bahoaka.

Monina eny Androndrakely izy io araka ny fitantaran’ny reniny, izay nitady azy efa andro maromaro. « Efa efatra andro aho izao no nitady azy ary efa nanao ombay mitady teny amin’ny mpitandro filaminana fa tsy hita mihitsy izy. Ny olona niteny anay fa efa maty izy fa tsy hitanay kosa no nasian’izy ireo ny vatan-mangatsiakany », hoy ny reniny. Manahy noho izany ny fianakavian’ny maty sao nalevin’ireo olona any ho any ny fatin’ilay tovolahy ary tsy  hisy tohiny intsony izao raharaha izao.

Laurena Nany