Tsy mitsahatra ny lozam-pifamoivoizana ateraky ny fiara taksibe, indrindra ireny marika Mercedes Sprinter. Mpandeha an-tongotra miisa 4 no nofaohin’ny Sprinter iray zotra mampitohy ny Mausolée sy Andranomena, ny alahady tolakandro teo, teny Ambodimita. Lehilahy ny roa tamin’ireo niharam-boina izay samy tapaka ranjo avokoa ary renim-pianakaviana nitrotro zaza ny fahatelo. Ity farany izay voa teo amin’ny lohany. Ny fahefatra dia ilay zazakely notrotron’ilay ramatoa izay tsy nahitana ratra teny aminy.

Nandeha mafy ilay taksibe sady nisongona fiara hafa teo alohany rehefa nidim-pidinana, araka ny fitantaran’ny nanatri-maso.Tsy voafehin’ny mpamily tampoka anefa ny familiana ka  nibirioka tany amin’ny tsy tokony nalehany.

Raha tsiahivina, taona vitsy lasa izay dia nisy Sprinter hafa, amin’io zotra io ihany, efa nahafaty mpandeha an-tongotra sy mpivarotra amoron-dalana, mbola teny Ambodimita hatrany. Fandehanana mafy sy fisongonana fiara hatrany no nahatonga ny loza tamin’izany fotoana izany. Mahakasika ity zotra ity hatrany dia maro ireo olona mahatsikaritra fa lava loatra ny lalany izay mety ho anisan’ny manosika ireo mpamily handeha mafy, raha tsy hilaza fotsiny, ny havizanana sy ny tsy fifehezana ity karazana fiara ity.

L.N