Jiolahy roa no lavon’ny balan’ny polisin’ny Uir Toamasina, ny alahady 18 oktobra, tamin’ny 5 ora hariva. Nahazo vaovao avy tamin’ny olon-tsotra ny polisy nilaza fa misy lehilahy roa mitondra basy, eny Salazamay. Nidina teny an-toerana avy hatrany izy ireo nijery ny zava-misy marina. Vao nahatazana ny mpitandro filaminana ireo olon-dratsy dia nitifitra avy hatrany. Raikitra ny fifanenjahana teo amin’ny roa tonta, ary voatery tsy maintsy namaly ihany koa ny avy aty amin’ny polisy. Naharitra ora maromaro ny fifandonana teo amin’izy ireo, araka ny vaovao avy amin’ny polisim-pirenena.

Voan’ny balan’ny polisin’ny Uir anefa dia maty tsy tra-drano ireo roalahy ireo. Nalain’iry voalohany avy eo ny basy nampiasain’ireto jiolahy, izay marika Unique. Mbola nahitana antsy ihany koa tany amin’izy ireo nandritra ny fisavana azy roalahy ireo. Ireo fitaovana ireo moa dia nentin’izy ireto nampitahorana ny lasibatra izay sendra azy.