Mirongatra ny asan-jiolahy na dia amin’ny andro antoandro aza any Toamasina, indrindra fa any  amin’ny Cité Valpinson sy Morafeno. Nitrangana fanafihana intelo misesy ireo toerana ireo, ny faran’ny herinandro lasa iny. Ny sabotsy antoandro teo dia fiara iray no very bateria rehefa nipetraka teo an-tokontany, tao amin’ny fokontany Cité Valpinson no nisehoan’izany. Ny alin’io ihany dia tokantrano iray no nidiran’ireo mpanafika an-keriny. Tamin’ny filaminana tanteraka no nanaovan’izy ireo ny asa ratsiny. Nesorin’izy ireo hatramin’ny vy maranitra amin’ny fefy, ka teo izy ireo no niditra, araka ny vaovao voaray. Ny tompon-trano tsy naheno na inona na inona vokatry ny fisian’ny rotsa-korana tamin’izay fotoana izay. Lasa ihany koa ny baterian’ny fiara nipetraka teo an-tokontany. Nikasa hanokatra ilay fiara izy ireo no naneno tampoka ny « alarme » ka rifatra nandositra.

Ny alahady 18 hifoha alatsinainy 19 oktobra, tokony tamin’ny 1 ora, tokantrano iray hafa, teny Morafeno 14/33 no niharan’ny hetraketrak’ireo jiolahy. Ankoatra ny fandrobana nataon’ny olona efa-dahy tsy nisaron-tava dia tovovavy iray 16 taona zanaky ny tompon-trano no niharan’ny fanolanana tambabe. Simba tanteraka ilay ankizivavy tamin’ny fizahana nataon’ny mpitsabo.

Antsasak’adiny taorian’ny fanafihana vao tonga ny Fip saingy efa lasa lavitra ireo jiolahy. Olona iray ahiahiana no efa nosamborin’ny mpitandro filaminana, omaly maraina.

Laurena Nany