Nandriaka ny rà. Zazavavy kely 12 taona no maty voahitsaky ny fiara tsy mataho-dalana, omaly, tao an-tampon-tanànan’i Fenoarivo Atsinanana. Handeha hamonjy lakilasy maraina, hiditra amin’ny 8 ora, izy izao niharan-doza izao. 4×4 hihazo ny tanànan’i Toamasina ity nandona azy ity raha nanapaka ny arabe ilay zazavavy. Nipitika lavitra ny toerana nisehoan’ny loza noho ny dona mafy nahazo azy ity zazavavy ity raha ny fitantaran’ireo nanatri-maso ny loza. Nentina haingana tany amin’ny hopitaly ilay niharan-doza, kanefa namoy ny ainy nony tonga kelikely tany noho ny hamafin’ny ratra nahazo azy sy ny habetsahan’ny rà very taminy.

Manoloana  ny sekoly fianaran’ilay zaza moa no niseho ilay loza ka nandray ny andraikiny feno amin’ny fikarakarana ny razana ny fari-piadidiam-pampianarana ao Fenoarivo Atsinanana manoloana ity tranga ity. Ny mpamily ilay fiara kosa efa eny amin’ny mpitandro filaminana miaraka amin’ny fiarany natao famotorana.