Tovovavy vao 15 taona monja ary fantatra fa nitoe-jaza manodidina ny efa-bolana no novonoina tamin’ny fomba feno habibiana, tany Ambodimanjaka, kaominina Alarobia Vatosola, distrikan’Andramasina. Tsy fantatra ny fotoana nisehoan’ny loza fa tamin’ny talata lasa teo no hitan’ny fokonolona tanaty lavabato, tao Antavibe, ny fatiny.

Hatairana ny an’ireo fokonolona raha nahita fatim-behivavy izay tena nampihoro-koditra tanteraka. Feno ratra ny vatany iray manontolo ary ny akanjo nanaovany ihany no namatorana ny tanany sy nanapenana ny vavany mba tsy ahafahany mikiakiaka mandra-pahatapitry ny ainy. Nampandre ny tompon’andraikitry ny tanàna avy hatrany ny olona, ireto farany indray avy eo no nampilaza ny zandary sy ny mpitsabo hanao fizahana ny razana.  Nandritra ny fizahana no nahalalana fa bevohoka io tovovavy io, feno ratra sy mangana ny masony ary nivoa-drà ihany koa ny vavany sy ny orony. Fantatra ihany koa fa nokendaina tamin’ny akanjony ihany izy satria mbola tavela teo amin’ny tendany ilay lamba. Tamin’ny fanadihadiana natao no nahafantarana fa ny sakaizany tokony ho 20 taona ihany no nahavanon-doza fa mbola tsy fantatra kosa ny antony nahatonga azy haninjitra ny tanany ka nahavita izao habibiana tsy roa aman-tany izao.

Laurena Nany