Lehilahy miisa 3 no matin’ny fitsaram-bahoaka tao amin’ny tanànan’i Batanty, kaominina Mantaly, any amin’ny distrikan’Ambilobe, ny sabotsy lasa teo. Nisandoka ho zandary  ary maka vola amin’ny fokonolona izy ireo. Fantatra ihany koa fa manao fanafihana mitam-piadiana mampihorohoro ny olona ao amin’io toerana voalaza eo ambony io izy ireto.

Saika handeha haka vola tamin’ny mpanao toaka gasy ireny mihitsy ireo telolahy no nisy nahatsikaritra satria tsy vao sambany no nanao io teti-dratsy io, araka ny loharanom-baovao fa efa maro ireo olona lasibatra. Mailo ihany koa ireo fokonolona ka nampandre ny sefo fokontany tao an-toerana. Ity farany indray avy eo nampiantso ny manam-pahefana, rehefa nilazana ny zava-misy izay nanambara fa tsy zandary akory ireo olona ireo. Vao naheno izany ireo fokonolona dia nanao fitsaram-bahoaka avy hatrany. Tao ireo nitoraka biriky sy namely tamin’ny hazo be ary nidaroka sy nandaka. Tsy nahatohitra ny hatezeran’ny fokonolona ny mpitandro filaminana ka maty teo no  ho eo ny iray tamin’ireo olon-dratsy. Nentina tany amin’ny hopitaly kosa dia ireo namany roa fa namoy ny ainy ihany koa rehefa tonga kelikely tany.

Laurena Nany