Taorian’ny velam-pandrika nataon’ny zandary dia sarona tao Amborovy, tany Mahajanga ny roalahy izay malaza mpisoloky, ny zoma teo. Milaza fa mahita menaka voay sy menaka dragona izy roa lahy izay amidiny 37 tapitrisa ariary. Nisy, noho izany, ny fifampiresahana teo amin’ny vehivavy iray sy izy roa lahy, ny alakamisy. Nandritra ny fihaonana indrindra no nisalasala ilay ramatoa ka tsy nanome vola avy hatrany fa kosa namerina ireo olon-dratsy ny  ampitson’io. Nampandre ny zandary ilay ramatoa avy eo ka tamin’izany no nanaovana velam-pandrika ary nahatratrarana azy ireo.

Araka ny fantatra hatrany dia mody miantso vazaha ireo mpisoloky rehefa mahita olona hanaovany ny asa ratsiny ary misy tokoa ny olona mamaly any ambadika amin’ ny finday izay manazava amin’ny teny vahiny ary miezaka mandresy lahatra ilay mpividy. Efa nisy olona mihitsy nahazoan’izy ireo vola mitentina 90 tapitrisa ariary.

Tamin’ny fanadihadiana azy ireo no nahalalana fa menaka sakafo sy nofon-trondro matavy no ahodin’izy ireo ka ny menaka azo avy eo no atambatra ka lazain’izy ireo fa menaka dragona na mena-boay.

Laurena Nany