Tsy tsinjo ny vodilanitra teto an-drenivohitra Antananarivo fa nanjakan’ny zavona tanteraka ny harivan’ny sabotsy sy alahady lasa teo. Midorehitra mena ny masoandro, raha vao nilatsaka ny hariva nanomboka tamin’ny 5 ora. Vokatry ny doro-tanety mirongatra nataon’ny be hetraketraka amin’ny manodidina no mahatonga izany. Araka ny tatitra voaray dia nanjakan’ny doro-tanety ny tany Ambatondrazaka, Anjozorobe, Moramanga, Ankazobe; nisy ihany koa tany Miandrivazo miakatra an’Antsirabe tamin’iny herinandro iny ka mitambatra ireny setroka ireny noho ny fitsokan’ny rivotra avy any Atsimo Atsinanana.

Vokatry ny doro-tanety dia nanaiki-maso tanteraka ny rivotra teto an-drenivohitra. Maro ireo mpandeha an-tongotra nahatsapa fa mampangirifiry maso ny zavona nandrakotra ny tananan’Antananarivo. Ho an’ny olona voan’ny sohika izao dia manahirana mafy ireny toe-javatra ireny.

Manoloana izany dia nanatanteraka fivoriana haingana ny  teo anivon’ny governemanta, ny alahady alina teo, tokony ho tamin’ny 8 ora sy sasany, izay tao anatin’ny « conseil restreint ». Efa nisy, noho izany, ny fepetra noraisina, araka ny fanambaran’ny praiminisitra. Ary sazy mihatra 5 taona hatramin’ny 10 taona an-tranomaizina no azon’ireo olona tratra mbola minia mandoro tanety.

Araka ny fanambaran’ny Praiminisitra hatrany dia irony atao hoe « El noni » irony iny nitranga teto an-drenivohitra iny, na ny fiakaran’ny maripana, izay mety mampihena rotsakorana amin’ny toerana efa tsy dia misy orana ary mety hitarika haintany fa ho an’ny toerana be orana indray dia hihamafy izany.

L.N