Mba ho fitsinjovana ny tsy fananan’asan’ireo tanora amin’ny ho avy dia atsangana ny sekoly teknika isaky ny faritra 22 eto Madagasikara. Amin’izany no ampitomboana ny fandraisana tanora hiditra hianatra amin’ny sekoly teknika fiofanana arak’asa.  Eny amin’ireo sekoly izay efa nisy hatramin’izay sy ireo mbola amboarina no hanaovana izany. Tafiditra ao anaty paik’ady natao Paritra zary ohabolana ity tetik’asa ity araka ny fanambaran’ny praiminisitra, Jean Ravelonarivo, tao amin’ny Paon d’Or Ivato, nandritra ny kabary nataony, tamin’ny fanambarana ofisialy ny politika nasionaly ny asa sy ny fiofanana arak’asa.

Nolazainy fa efa misy ny vola natokana ho an’io tetikasa io izay mitentina 186 miliara ariary isaky ny faritra 22, ka alaina amin’ny volam-panjakana, nanomboka ny taona 2015 ka hatramin’ny 2019.

Mba  ampitomboana ny fianaran’ireo tanora asa dia  hisy ny fiaraha-miasan’ny fanjakana amin’ny sehatra samihafa. Izany dia ho fanampiana ny tanora mandra-pidirany  amin’ny sehatry ny asa. Izany dia fanofanana azy ireo hamorona asa ho an’ny tenany ihany koa.