Tany amin’ny kaominina Andranomamy, any amin’ny lalam-pirenena Rn4 no nitrangan’izany, tamin’iny herinandro lasa iny. Fantatra fa nisy andian-dahalo nanafika io tanana io, tapa-bolana lasa izay, ka tamin’izany no nahaverezana omby maromaro. Nisy ny fanarahan-dia nataon’ny zandary sy ny fokonolona taorian’io halatra io, ka tao amin’ny tanàna kely atao Antsohikely no sarona ireo dahalo niaraka tamin’ireo omby nangalariny.

Vao nahatazana ireo mpitandro filaminana ireo dahalo dia nitifitra avy hatrany ka raikitra ny fifandonana teo amin’ny roa tonta. Dahalo iray no maty voatifitra ary iray hafa voan’ny bala teo amin’ny tanany ary vaky nandositra kosa ny ambiny. Nisy zandary iray ihany koa voatifitra teo amin’ny sandriny sy ny faritry ny lohany ka torana tsy nahatsiaro tena. Araka ny loharanom-baovao dia niafina teny ambony manga io dahalo naratra io ka noraisim-potsiny saingy notifirin’ny mpitandro filaminana rehefa vita ny fanadihadiana natao taminy. Sarona ny basy roa nampiasain’ireo mpangalatra ary tafaverina amin’ny tompony avokoa ireo omby very.

L.N