Raha saika hiakatra fitsarana omaly alakamisy, tamin’ny 8 ora maraina, tany Toamasina, ilay raharaha fanolanana zazavavy 16 taona, tao Morafeno dia nahemotra amin’ny fotoana tsy fantatra indray. Olona miisa 3 no efa nampidirana am-ponja vonjimaika ao Ambalatavoahangy momba ity raharaha ity.

Raha tsiahivina dia ny alin’ny alahady 18 oktobra, tao Morafeno 14/33 no nidiran’ny andian-jiolahy  an-keriny ny tokantrano iray. Tsy vitan’ny nandroba fananan’ny olona izy ireo tamin’izany fotoana izany fa mbola nentin’ireo jiolahy an-keriny ihany koa ny zanaky ny tompon-trano, izay vao 16 taona monja. Araka ny fanazavan’ny renin’ilay ankizivavy dia mbola virijiny io zanany io ary saika hanolo-tena ho masera kanefa niharan’ny hetraketraky ny olon-dratsy.

Ity fitsarana ity dia arahin’ny olona maro any an-toerana akaiky nefa izao nahemotra izao indray. Maro ireo olona no tonga teny amin’ny fitsarana izay naneho tamin’ny tsy fahafalian’izy ireo tamin’izao nanemorana ity raharaha ity izao.