Jiolahy miisa 3 no saron’ny zandary ny faran’ny herinandro teo, tany Ambatomirahavavy. Roa tamin’izy ireo voasambotra, ny zoma 30 oktobra, tamin’ny 5 ora hariva, taorian’ny fampandrenesana voarain’ny mpitandro filaminana, mahakasika olona 2 mampiahiahy ao amin’ny fokontany Kianjamala, any an-toerana. Nidina teny an-toerana avy hatrany izy ireo, ary mbola tratra tamin’ireo jioalahy ny akoho miisa 7 izay vao nangalarina.

Ny sabotsy 31 oktobra kosa no voasambotra ny tovolahy iray izay nangalatra ny ombin’ny raibeny. Tamba-jotra avy aty an-drenivohitra no miara-miasa aminy, ary mbola karohina avokoa ireo namany amin’izao fotoana izao. Tamin’ny fanadihadiana natao azy vonoin’izy ireo ny omby rehefa azony ary ny nofony ihany no entina amidy aty Antananarivo.

Niaiky ny heloka vitany avokoa ireo jiolahy. Araka ny loharanom-baovao avy amin’ny zandary dia efa mateti-pitranga eny amin’iny faritra Ambatomirahavavy ny tranga toy izao, fa izao vao sarona. Natolotra ny fitsarana any Arivonimamo omaly izy telo lahy.

L.N