Zazavavikely 5 taona no fantatra  fa naolan’ny anadahin-dreniny tamin’ny faran’ny herinandro iny, teny Anosibe. Nanararaotra ny tsy na teo ireo ray aman-drenin’ilay zaza ilay tovolahy no niditra an-tsokosoko tao an-trano. Nandeha namonjy alim-pandihizana izy mivady, araka ny loharanom-baovao akaiky ny lasibatra ka ilay zazakely irery no navelan’izy ireo tao an-trano. Notampenany avy hatrany ny vavan’ilay ankizy vavy kely sao mikikiaka ary novetavetaina avy eo. Taitra ny ray aman-drenin’ity farany raha tafaverina avy tamin’ny toerana izay nalehan’izy ireo nahita ny zanany feno rà teo amin’ny feny. Rehefa nanontaniana ilay zazakely dia nilaza fa io anadahin-dreniny io no nahavanon-doza.

Nentina nojerena teny amin’ny hopitaly Befelatanana ilay ankizy kely ary fantatra fa simba tanteraka raha ny fanambaran’ny mpitsabo. Tsy vitan’izay ihany koa fa ahiana mafy ny toe-pahasalamany. Ilay nahavanon-doza kosa karohina fatratra amin’izao fotoana izao. Efa eo am-pelatanan’ny polisy misahana ny zaza tsy ampy taona ny raharaha.

Laurena Nany