Nirefodrefotra ny basy ny alahady hariva teo, tao amin’ ny fokontany Andamboly, any Toliara. Andian-jiolahy nirongo basy mahery vaika no nanafika mpamongady. Teo am-panidiana ny tsena iny indrindra ilay mpivarotra no tonga masiaka ireo

olon-dratsy sady nanapoaka basy. Niparitaka avokoa ny olona tany an-toerana, ka teo am-pandosirina nivoaka ny trano fivarotana no voatifitra avy ao an-damosina ny lehilahy iray tompon’ny tsena, raha toa ka voatsatoka antsy teo amin’ny lohany ny rainy, izay nikasa hanohitra ireo jiolahy.

Tahotra ny ho faty dia natolotry ny tovovavy iray, zanaky ny tompon’ny tsena ny vola an-tapitrisa tao anaty sakaosy. Ramatoa iray no nikasa handositra raha vao avy nanome ilay vola ilay tovovavy fa narahin’ireo olon-dratsy avy aty aoriana ka nodarohan’izy ireo ary naratra ihany koa. Ankoatra ny vola be dia lasa ihany koa ny finday sy ny volamena teny amin’ireo lasibatra.

Nampandre ny mpitandro filaminana ny manodidina ka antsasakadiny aty aoriana vao nigadona ireto farany. Efa lasa lavitra kosa ireo jiolahy mpandroba.

Laurena Nany