Nitrangana haintrano tao amin’ny fokontany Mahajanga be, ao amin’ny sektera La Corniche, any Mahajanga, ny alin’ny alatsinainy hifoha talata, tokony ho tamin’ny 9 ora. Trano fonenan’ny sekretera jeneralin’ny faritra Boeny ao anatin’ny biraom-paritry ny fiompiana amin’izao fotoana izao ity kila forehitra ity. Tsy fantatra ny niandohan’ny afo na avy tamin’ny “gaz” na noho ny fipoahan’ny herinaratra fa trano misy efitra 7 no indray nolalaovin’ny afo ary rava niaraka tamin’izany ihany koa ny entana rehetra. Fantatra ihany koa fa tsy tany an-toerana ingahy sekretera jeneralin’ny faritra sy ny fianakaviana tamin’ny fotoana nisehoan’ny loza fa taty an-drenivohitra ka ny mpiambina ihany no tao ary afo efa nijoalajoala no nanaitra ity farany.

Naharitra adiny iray sy sasany ny famonoana ny afo ka tsy nisy afa-tsy seza « salon » sy « baffle » ary fahitalavitra lehibe iray no avotra. Tsy nisy kosa ny aina nafoy na naratra. Misokatra ny fanadihadiana ataon’ny mpitandro filaminana any an-toerana.

L.N