Mankalaza ny tsingerin-taona faha-25 taona nijoroany ny Cospn na ny Club omnisport de la police nationale amin’ity taona 2015 ity. Mandritra ity volana novambra ity no hankalazana izany ka ny zoma izao no ho tanterahana eny amin’ny kianjaben’iMahamasina, ny fanokafana ofisialy izany, izay hifamotoana ny polisy rehetra. Hisy, noho izany, ny hazakazaka madinika hihazo ny foiben’ny polisim-pirenena Anosy, izay iarahan’izy ireo manao. Avy eo dia hisy ny kabary ifandimbiasana, aorian’izay ny fizarana mari-pankasitrahana ho an’ireo atleta nahavita be teo anivon’ny Cospn nandritra izay 25 taona izay sy fanolorana faneva ho an’ireo mpitantana ny klioba. Hetsika ara-panatanjahantena hifaninanan’ireo sampan-draharaha samihafa eo anivon’ny Polisim-pirenena no hiseho madritra ity volana novambra ity ka ho hita amin’izany ireo taranja rehetra misy eo anivon’ny Cospn toy ny baolina kitra, basket-ball, fibatana fonjam-by, hazakazaka. Ny 28 novambra 2015 mandritra ny famaranana ny lalao baolina kitra eny amin’ny kianjan’Alarobia no atao ny lanonam-pamaranana.

Nangonin’i L.N