Raha tora-bato sy fangalarana entana eny ambony fiara no malaza amin’ny lalam-pirenena Rn44 hatramin’izay, tamin’ity indray mitoraka ity, nitrangana fanafihana fiara indray iny lalana iny. Vatan-dehilahy miisa 3 nirongo basy no nanakana fiara iray, tao Ambohidava, ny alin’ny 3 novambra lasa teo. Nanararaotra ny faharatsian’ny lalana ireo jiolahy, indrindra amin’izao fotoanan’ny orana izao.

Nanapoaka basy avy hatrany  ireto olon-dratsy ampihorohoroana ireo mpandeha. Lasan’ny ireo olon-dratsy tamin’izany ny volan’ireo mpandeha mitentina Ar 3 000 000. Vehivavy iray ihany koa no naratra mafy nodarahan’izy ireo tamin’ny vodibasy. Nanao taim-bava tamin’ireto mpanafika no fantatra fa nahatonga izany fahavoazany izany.

Mihoron-koditra tanteraka ireo mpampiasa ity lalam-pirenena ity amin’izao fotoana izao ary manaitra ireo tompon’andraikitra rehetra mba hijery akaiky ny tsy fandriampahalemana izay tena goragora, araka ny loharanom-baovao. Nampandrenesana ny zava-misy ny mpitandro filamina ary efa mandeha ny fanadihadiana ataon’ny zandary any an-toerana hikarohana ireo jiolahy ireo.

Laurena Nany