Tontosa ny zoma lasa teo, tao amin’ny hotely Le grand Mellis, ny lanonana famoahana ny andiana « Fanantenana », tao amin’ny « Institut supérieur d’enseignement technologique et des sciences » na Isets. Miisa 28 ireo mpianatra izay voalohany nahazo ny mari-pahaizana hatramin’ny nijoroan’ity sekoly ambony ity. Ny « Diplôme de technicien supérieur » (Dts) na Bacc+2, teo amin’ny sampam-pianarana fitantanana, informatika,  serasera sy « multimédia » ary ny fanamboarana foto-drafitr’asa govana  nozaraina tamin’ireo mpianatra. Santatra ambavarano ihany ireo fa manomboka amin’ity taona 2015 ity dia hizara diplaoma lisantsa sy Mastera I sy II ny sekoly Isets ho fanomezana fahalalana bebe kokoa ireo mpianatra ao aminy.

« Ny mpianatra ato amin’ny Isets, tsy maintsy manatanteraka fianarana asa isaky ny telo velona ary ny 70 isan-jatony ny fampianarana dia fampiharana avokoa. Izany no natao mba hifehezan’izy ireo ny asany ary ny ankamaroany mpianatra ato aminay dia olona efa miasa avokoa », araka ny fanambaran-dRakotonirina Hanitra, tale akademika ny Isets.  Mandritra ny fianarana asa dia misy ny fanaraha-maso akaiky ataon’ny sekoly amin’ireo mpianatra any amin’ireo orinasa miara-miasa aminy. Mampiavaka azy ihany koa ny fanabeazana ny maha olona.

Laurena Nany