Lany andro ny «Code de la nationalité» na ny lalàna mifehy ny fizakana ny zom-pirenena malagasy. Ny tena marina aza hoy ny « Focus Development Association”, fikambanana tsy miankina, dia tsy mifanentana intsony amin’ny vaninandro ankehitriny io lalàna io. Tena tsy mifanaraka amin’ireo lalàna velona (Lalampanorenana) sy ireo fifanarahana iraisam-pirenena efa nankatoavina’ny firenena malagasy.

Tsy lojika tokoa ny zava-misy eto amintsika raha dinihina, satria ilay lalàna mametra ny tsy fahazoana zom-pirenena malagasy ho an’ny zaza nateraky ny reny malagasy manambady ara-dalàna olona hafa firenena, dia mety hahatonga ilay zaza ho tsy mizaka zom-pirenena (apatride) raha sanatria tsy mahazo izany any amin’ny rainy izy.

Ny zaza sary kosa anefa, izay tsy fantatry ny lalàna ny rainy, dia mahazo io zom-pirenena malagasy io, na dia fantatra ara-piaraha-monina aza, fa olona hafa firenena no nanao tokantrano maso tamin-dreniny.

Santionany sy ohatra iray ihany io, fa maro ireo sakantsakana isan-tokony tsy nahazoan’ny olona teraka fahagolantany sy nitoetra ela teto Madagasikara ny zom-pirenena maha-malagasy azy ireo ka angatahana tosika avy amin’ny tontolon’ny gazety sy ny serasera.

Solo R.