Drakaka tsy ara-dalàna milanja 80 kilao no tra-tehaky ny tompon’andraikitra tany Morondava teny amin’ny fihantsonan’ny taksiborosy. Saika alefa aty Antananarivo ireo hazandrano anaty fotaka ireo ary nisy taratasy ihany saingy tsy mifanaraka amin’ny voalaza ny lanjany. Raha ny voalaza tao anaty fahazoan-dalana mantsy dia saika ho an’ny fianakaviana ireo biby fanao sakafo ireo ary 10 kilao ny lanjany. Nanamarika anefa ny tompon’andraikitra fa 5 kilao ihany no fetran’ny azo alefa toy izao. Izany hoe na ilay taratasy aza dia nanaovana kolikoly no nahazoana azy.

Nanapa-kevitra ny tompon’andraikitra fa ho zaraina amin’ireo fikambanana mpanao asa soa toy ny mpitaiza zaza kamboty sy beantitra ireo foza be ireo satria afaka amidy ary hahazoan’ireo fikambanana vola hanasoavana ny asa sosialy. Fepetra iray izay nanehoana ihany koa fa tsy nisy ny kolikoly afaka nataon’ny tompony namerenana taminy ireo entana fa dia hentitra ny tompon’andraikitra.

Ra-Dom