Vola be ny bizina taolam-paty ka tsy mahagaga raha mirongatra ny vaky fasana. Mahatratra 6,5 tapitrisa ariary ny taolan-dava iray kilao any Mahajanga, raha ny fitantaran’ireo jiolahy sarona tamin’ity heloka bevava iray ity.Tamin’ny alahady lasa teo izy ireo no tra-tehaka tao Mariarano niaraka tamin’ny taolan-dava milanja 28 kilao saika amidy any Mahajanga. Telolahy izy ireo no tra-tehaky ny polisy ary niaiky ny heloka vitany. Mitohy ny fanadihadiana saingy tsy mbola nisy nivoaka kosa ny anaran’ireo mpandray ny taolana sy ny mety ampiasana izany.

Hatreto aloha dia saika mijanona eo amin’ny fisamborana ireo mpitondra sy mpivarotra ny taolana ny fanadihadian’ny mpitandro filaminana fa mbola tsy nisy mihitsy vavao ofisialy mahakasika ny mpaniraka sy mpandray ary mpampiasa ireo taolan-dava angalarina any am-pasana.

Tombatombana fotsiny ny an’ny maro fa hanamboarana firavaka avo lenta any ampitan-dranomasina izy ireny. Azo avadika ho diamondra mantsy ny taolan’olombelona rehefa tena betsaka ka ny taolan-dava no voalazan’ny manam-pahaizana fa tena mety amin’izany.

Ra-Dom