Ho fanatsarana ny fahasalaman-bahoaka sy ny andavanandron’ny mponina dia notolora ny Rotary Club « générateur d’oxygène » ny Hopitaly be any Toamasina. Efa nanomboka ny 28 aogositra lasa teo no niasa ity fitaovana vaovao ity izay misy fiantohana sy fikolokoloana mandritra ny 2 taona. Atrikasa izay notanterahana nandritra ny herintaona notantanin’i Mandimby Rajerisoa, niaraka amin’ny fandraisana anjara ny Rotary Club, Noumea Ducos Boular sy ny lefitry ny governora Shelly Oukabay.

Rotary maro no niara-nisalahy tamin’ny nahatontosa io atrikasa io, ao anatin’izany ny Rotary distrika 3730 Korea, distrika 9910 South Pacific, distrika 9910 Foundation Chair ary ny distrika 9220 ka « générateur d’oxygène » mitentina 100 000 dolara eo ity natolotra ny Hopitaly be Toamasina ity, avy tamin’ny orinasa Eole. Ny tanjon’ny Rotary dia ny hamonjy ireo olona marary mila « oxygène » amin’ny alalan’io « générateur » io. Araka ny fanambaran’ny lehiben’ny Rotary club Ivandry dia hisy ny fampiofanana ataon’ny orinasa Eole ireo mpiasa ao amin’ity hopitaly ity mba hiantoka ny fikolokoloana io fitaovana io aorian’ny 2 taona. Fa ny fahasitranan’ireo marary no tena ifantohana.

L.N