Lehilahy iray manodidina ny 50 taona hita faty natsingevan’ny ranon’Ikopa ny alahady atoandro, tokony tamin’ny 1 ora sy fahatelony, teny amin’ny faritra Ankadimbahoaka. Mety handeha hilomano no anton-dian’io rangahy io teny an-toerana , nefa izao navadiky ny rano izao. Hita teo amoron-drano tsy lavitra nisy ny razana mantsy ny fitafiany.

Nampandre ny mpamonjy voina ireo mponina teny an-toerana ary tamin’ny fahatongavan’izy ireo  dia mbola nihohoko tao anaty rano ny razana. Nampiakarina teo amoron-drano avy hatrany  mandra-pahatongan’ny tompon’andraikitra teo anivon’ny Bmh. Ora iray taty aoriana vao tonga teny an-toerana ity farany nanao fizahana ny razana ary fantatra fa maty nalentiky ny rano io lehilahy io. Voalaza ihany koa fa tsy mponina eny amin’eny manodidina eny ity olona ity satria tsy nisy nahafantatra azy ireo olona teny an-toerana. Naterina teny amin’ny tranom-paty, eny amin’ny hopitaly Hjra,miandry ny havany ny razana.