Jiolahy iray efa raindahiny amin’ny resaka fanafihana sy fandrobana fananan’nolona no maty tsy tra-drano lavon’ny balan’ny zandary, tany Ambohimasoa, ny alin’ny talata hifoha alarobia lasa teo. Tra-tehaky ny fokonolona teo am-pangalarana tao amin’ny tanana’Ambohipihaonatsoa io lehilahy io ka nentin’ny mponina namonjy ny biraon’ny mpitandro filaminana. Teny an-dàlana indrindra anefa, nitsaoka ity jiolahy ity ka tazan’ireo mpitandro filaminana izany. Nanao tifi-danitra izy ireo mba ampijanonana azy fa vao mainka nirifatra nandositra ilay olon-dratsy ka voatery nitifitra azy ireo zandary.

Vokatry ny fahaverezan-drà be loatra dia maty teo no ho eo ilay mpangalatra. Araka ny fanampim-baovao voaray hatrany dia mahazo vahana tanteraka ny asan-dahalo any an-toerana amin’izao fotoana izao. Fantatra hatrany fa ataon’ny dahalo hazalambo ny omby sy ny akoho amam-borona any ambanivohitra raha toa ka ny vaky trano sy hala-botry no mirongatra an-tanan-dehibe. Tsy latsaky ny efatra isan-kerinandro ny fitarainana voarain’ny mpitandro filaminana any an-toerana.