Vokatry ny fifandonana mafy be teo amin’ny kodiaran-droa sy omby iray niampita tampoka ny lalana dia naratra mafy ilay lehilahy namily izany ary ilay omby kosa maty tsy tra-drano. Ny alatsinainy tolakandro no nitrangan’izany, tao amin’ny tanànan’Ambalavao, kaominina Manakambahiny Andrefana, tany amin’ny lalam-pirenena Rn44. Saika hihazo ny tanànan’i Vohidiala ity môtô ity izao tra-doza izao. Nentina haingana tao amin’ny toeram-pitsaboana any an-toerana ilay naratra.

Araka ny vaovao voaray dia mila fitandremana ny familiana fiara na môtô ao amin’iny Rn44 iny satria tsy sambany izao no nisy lozam-pifamoivoizana noho ny fisian’ireo omby asesin’ny olona eny an-dalam-be izay mety hitera-doza. Eo ihany koa ireo omby mivoaka tampoka avy any anelakelan-trano izay mihazo ny lalam-be ka manapaka tampoka, izay mety hahatonga ny loza.

L.N