Amin’izao fotoana izao dia miatrika ny fiombon’ny olana ara-tontolo iainana i Madagasikara, izay ateraky ny fanapahana ny ala. Fantatra fa ny Faritra Boeny no laharana voalohany amin’ny fandringanana ala eto amin’ny Nosy satria very 400 ha hatramin’ny 600 ha ala isan-taona ity faritra ity. Ny fikarohana nataon’ny fikambanana Komanga, niarahana tamin’ny fiarahamonim-pirenena eo amin’ny sehatra ny tontolo iainana, teo amin’ny fandraisana anjara ny Actifs sy Giz, no nahafantarana fa ireo mpifindra monina any an-toerana, indrindra ao amin’ny kaominina Anjijia no tena mahatonga izany.

Araka ny tatitra voaray avy tamin’ny filohan’ny Kofimanga, Rafaofera Mamisoa, olona 200 isan-kerinandro no tonga ao amin’io kaominina io ka ny 80 isan-jato amin’ireo terak’i Toliara ary mpifindra monina an-tsokosoko. Manoloana izany indrindra nanantanteraka atrikasa teny amin’ny Institut d’études politique (IEP) mba hitadiavana vahaolana haingana sy maharitra  ary azo ampiharina avy hatrany ny fikambanana Kofimanga. « Raha faritra maitso iny Avaratra Andrefana iny teo aloha dia efa lasa faritra volom-boasary izy amin’izao ary kely sisa ho lasa mena, raha mitohy izao fandripahana ala izao ary tsy haharitra 10 taona akory izany », hoy hatrany ny filohan’ny Kofimanga.

L.N