Tovolahy iray manodidina ny 25 taona no hita faty natsingevan’ny ranon’Ikopa ny alarobia hariva, tamin’ny 4ora sy sasany, teny amin’ny tetezan’Ampasika. Tamin’ny fahitana ny razana dia nianjera avy eny ambony tetezana ity lehilahy ity ary notatazan’ny vato be tao ambany tao ka maty avy eo.

Nidina teny an-toerana ny zandary sy ny mpamonjy voina niaraka tamin’ny mpitsabo nampiakatra ny vatana mangatsiakan’ilay tovolahy. Araka ny fanambaran’ny manodidina dia nisotrosotro izy no hitan’izy ireo farany. Mety mamo noho izany ilay tovolahy ka nianjera avy ambony tetezana nandalo izany raha hamonjy fodiana. Natolotra ny havany ny razana taorian’ny fizahanan’ny mpitsabo.

Tao anatin’ny herinandro monja izao dia olona roa no efa navalan’ny ranon’Ikopa. Raha tsiahivina dia rangahy iray 50 taona tany ho any no hita faty manodidina ny Ankadimbahoaka iny, ny faran’ny herinandro teo. Sendra nilomana izy no navadiky ny rano tamin’izay satria hita teo amoron-drano, tsy lavitra ny razana, ny fitafiany.

Laurena Nany