Zandary 40 mirahalahy no nahazo « brevet de spécialité n°1 » momba ny fifandraisan-davitra, andiany faha-enina, tao amin’ny toby Ratsimandrava, ny fiandohan’ny faran’ny herinandro lasa teo. Marihina fa ho alefa hiasa manerana ny  Nosy izy ireto.

Naharitra enim-bolana ny faharetan’ny  fiofanana izay nanomboka ny 27 aprily 2015. Tanjona ny mba hahalasa “gradés” manam-pahaizana manokana momba ny fampitàna ireo “message radio” amin’ny alalan’ny fitaovana manaraka ny teknolojia amin’izao fotoana izao. Afaka miasa avy hatrany izy ireo ary tompon’andraikitra avy hatrany amin’ireo toerana izay hanendrena azy.
Tonga nanome voninahitra izao lanona izao ny jeneraly Rakoto François Rodin, kaomandin’ny zandarimariam-pirenena, notronin’ireo manamboninahitra jeneraly, manamboninahitra ambony, manamboninahitra lefitra ary ireo mpiasa sivily maro. Ka notsindrian’Atoa kaomandin’ny zandarimariam-pirenena nandritra ny lahateny izay nataony fa mitodika amin’ireo zandary avokoa ny mason’ireo vahoaka sy ny mpitondra fanjakana noho ireo tranga marobe izay iaraha-mahafantatra. Noho izany dia hentitra izy amin’ny fanarahana ny fitsipaka mifehy, indrindra amin’ny fanatanterahana ny asa. Satria izany no maha-miaramila ny miaramila, ny fanajana ny fitsipi-pifehezana na aiza na aiza toerana iasany.

L.N