Miavaka tanteraka amin’ireo orinasa miisa 33 mpanangona sy mpanondrana letisy ny orinasa Sodiat Export amin’izao fisokafan’ny taom-piotazana 2015 izao.Ny fanatsarana ny kalitaon’ireo voankazo aondrana, ny fanajana ny fahadiovana ara-pahasalamana eo amin’ny toerana iasana, ary ny fikajiana ny tontolo iainana no tena mampisongadina azy. Nambaran’ny tale jeneralin’ny orinasa, Andrianasolo José, fa « Ara-pahasalamana tanteraka ny fomba fikirakirana ny letisy noho ny fahaiza-mandamina ny fandaharan’asa eo amin’ny mpiasa », Manana mpitsabo manokana mihitsy natao hanara-maso ny fahasalaman’ireo rehetra miasa sy mivezivezy eo amin’ny toby fanangonam-bokatra ity orinasa ity. Mampiasa olona hatramin’ny 3000 isa ny Sodiat Export amin’izao taom-piotazana izao ary misy ihany koa ny mpanatitra vokatra letisy miisa 140 miara-miasa aminy ao amin’ny toby Analamalotra. Tsara ny kalitaon’ny vokatra ary manondrana any Dubaï ny orinasa. Ary manana anjara betsaka amin’ireo letisia milanja 18 000 taonina aondrana maneran-tany ihany koa. Marihina fa nisokatra ny 19 novambra teo ny taom-piotazana letisy ka efa tomefy olona any amin’ny faritra Atsinanana amin’izao fotoana izao. Mifanaretsaka ny mpamokatra sy mpanangom-bokatra ary ireo mpitatitra. Tany an-toerana ihany koa ny minisitryny Varotra ary nametraka sakana fanaraha-maso ny taratasy fahazoan-dalana ampiasain’ireo mpisehatra rehetra eo amin’ity varotra iray ity.

Radôm