Olona miisa 11 indray no nosamborin’ny polisy, ny alakamisy maraina teo, teny Analakely, nandritra ny « hetsika mpidiy volamena ». Ny fito lahy tamin’izy ireo dia voasambotra teo amin’ny manodidina ny Lapan’ny tanàna ary efa-dahy kosa manoloana ny sekoly EPP. Misy amin’izy ireo tsy sambany no voasambotra fa efa matetika nandalo famotorana tao amin’ny boriborintany voalohany noho io fividianana volamena tsy ara-dalàna io hatrany. Misy amin’izy ireo ihany koa no mpividy volamena sady mpividy entana halatra eny an-toerana. Tamin’ny fanadihadiana azy ireo no nahalalana fa manome « régime » na vola ireo mpanendaka ireo mpividy volamena ny maraina ka rehefa mahazo dia any amin’izy ireo ihany no amidy. Natolotra ny fitsarana omaly izy 11 mirahalahy.

L.N