Lehilahy iray no maty tsy tra-drano rehefa nitsoraka tao ambany fiara nandeha, tany an-tampon- tanànan’i Manakara, manakaiky ny tsena, ny zoma atoandro, tokony ho tamin’ny 1 ora mahery tany ho any. Tsy nisy nanam-po ny loza na ny mpamily ilay fiara, na ny fianakavian’ity namoy ny ainy ity fa tampoka, tao anatin’ny segondra vitsy monja no nisehoan’izany.

Araka ny loharanom-baovao avy any an-toerana, nandalo ny fiara iray nirimorimo, poa toy izay efa any ambany fiara nohosihosen’ny kodiarana ilay lehilahy vao tazana. Nahatsiravina ny loza fa nipotsaka hatramin’ny ati-dohany. Fantatra moa fa tsy dia salama saina izy io, ary matetika no tsy dia tompon’ny tenany loatra ka ahiana izay no nahatonga azy namono tena. Na dia izany aza anefa, tsy mba fanaony ny tahaka izao, araka ny filazan’ny fianakaviany. Nidina teny an-toerana ny mpitandro filaminana niaraka tamin’ny mpitsabo nanao fizahana ny razana. Ary natolotra ny fianakaviany avy eo.

Laurena Nany