Notanterahana ny alakamisy teo, teny amin’ny Banky iraisampirenena, eny Anosy, ny fanamafisam-piaraha-miasa teo amin’ny minisitry ny Fanabeazam-pirenena, Paul Rabary sy ireo mpiara-miombon’antoka amin’ny fanaraha-maso ny antsan-dalana amin’ny fandaharanasa « Pauet » (Programme d’appui d’urgence à l’éducation pour tous), izay tena nahazoana vokatra mahavelom-bolo tokoa. Fandaharanasa novatsian’ny Banky iraisam-pirenena vola mitentina 85,4 tapitrisa dolara ho fanatsarana ny fampianarana eny amin’ny ambaratonga fototra, ka anjaran’ny Pauet no mandray ireo « Dren » 12 ary tafiditra ao anatin’izany ny fizarana « kits scolaires » 1 982 305  ho an’ireo talem-pampianatra ho fanampiana ireo mpianatra mba hampazoto azy ireo hianatra.

Ny kilasy Cp1 ka hatramin’ny ny Cm2 any amin’ny « Dren » Ihorombe, ny « Cisco » Vatomandry, Antanambao Manampotsy, Marolambo, Mahanoro, Analalava, Antsohihy, Bealanana ary Befandriana Avaratra no efa nahazo ny anjara fitaovam-pianarana nanomboka ny taom-pianarana 2015-2016. Mbola tafiditra ao anatin’io fandaharanasa io ihany koa ny fampiofanana ireo mpampianatra, 2 800 amin’izany dia talen’ny « EPP » ary ny 20 000 kosa dia mpampianatra Fram, izay ho tanterahina mandritra ny fialan-tsasatra lehibe andiany faharoa.

L.N