Be dia be ireo olona tsy mahay mamaky teny sy manoratra eny amin’ny tontolo ambanivohitra, izay isan’ny vato misakana amin’ny fampandrosoana an’i Madagasikara. Manoloana izany indrindra dia namoaka mpampianatra miisa 14 avy amin’ny faritra 14 ny  fikambanana « Madagascar tourisme rural », fiaraha-miasa amin’ny Sarobidy ny fahasalamana fianakaviana tantsaha (Safafita) sy ny fiangonan’i Jesoa eto Madagasikara, hampianatra ireo tantsaha. Andiany Fanilo-Fitiavana-Fanantenana, nahavita ny fiofanana ho mpampianatra naharitra 10 andro, izay nanomboka ny 9 novambra ka hatramin’ny 19 novambra, teny amin’ny Fetikrima Ambodivona.

« Manana tsy fahafahana hamaky teny sy hanoratra ireo tantsaha eny amin’ny tontolo ambanivohitra. Mba hanala azy ireo amin’izay habadoana izany no tanjona tamin’ity tetikasa ity satria raha maro ny olona tsy mahay taratasy eto Madagasikara dia ho sarotra ny idirana amin’ny fampandrosoana », hoy Ravelomampionina Zanavolo Solomon, mpanentana ny tantsaha sady mpamorona ny tetikasa.