Lehilahy efa-dahy no saron’ny polisy teo am-pangalarana « câbles » izay an’ny orinasa Jirama, tao Andimahabo, tany Nosy Be Hell-ville ny alin’ny zoma lasa teo. Nandritra ny fisafoana nataon’ireo mpitandro filaminana no tratra izy ireo ka noraisim-potsiny fa tsy afa-nandositra. Tsy sambany izao fa araka ny fanazavana nomen’ny polisy mpanao famotorana dia mpangalatra efa mpamerin-keloka izy ireto ary efa za-draharaha. Fantatra fa io fangalarana ny tariby-n’ny orinasa Jirama io hatrany no efa nidiran’izy ireo am-ponja.

Tamin’ny fanambaran’ny tompon’andraikitra eo anivon’ny Jirama any an-toerana dia mahatratra 5 518 metatra ny halavan’ny « câble almélec » nangalarin’ireo efa-dahy ireo ary mitentina 93 289 850 ariary ny vidiny.

Mbola tsy fantatra kosa ny tena antony nangalaran’izy ireo izany tariby izany na ny olona maka izany fa ny siosion-dresaka no nahalalana fa misy sinoa mandray ny varahina amin’ireny « câble » ireny ka 9 000 ariary no andraisany ny iray kilao.