Tranga hafa kely no niseho tao Ambohitrangona, tany Sambava, ny zoma alina, tokony tamin’ny 9 ora tany ho any. Tovolahy iray manodidina ny 28 taona nikasa hangalatra no maty tsy tra-drano rehefa nosintomin’ny vehivavy, eo amin’ny 50 taona eo, ny filahiany. Tsy fantatra izay nahazo ilay tovolahy fa niboridana tanteraka izy niaraka tamin’ny famaky niditra an-keriny  tao amin’ny tokantranon’io ramatoa io, izay mipetraka miaraka amin’ny zafikeliny 12 taona, fa hoe handroba azy ireo.

Vao tafiditra tao an-trano anefa izy io dia nitolona ilay vehivavy lehibe ary nikasa hanapitra ny ain’ity farany saingy izy indray no nifoteran’ny teti-dratsiny. Tsy nisalasala mantsy ilay ramatoa nisintona mafy ny maha-lehilahy azy ka poa toy izay dia tapitra ny ainy. Nampandre ny mpitandro filaminana avy hatrany ilay lasibatra ka nidina teny an-toerana izy ireo nanao famotorana. Tsy nanano sarotra ny asan’ny zandary ny fijoroana vavolombelona nataon’ilay zazakely miara-mipetraka amin’ny lasibatra. Fantatra nandritra ny fanadihadiana fa mponina tao amin’ny fokontany Antaimby ilay mpangalatra.

Laurena Nany