Maro ireo tsaho mandeha momba ny vaksiny iadiana amin’ny “poliomyélite” ka mampisalasala ireo ray aman-dreny ny mitondra ny zanany hanao vaksiny. Mitondra ny fanazavana ny Dr Eric Andrianasolo, filohan’ny Holafitry ny dokotera : « Ny firongatry ny aretina poliomyélite teto Madagasikara no nanapahana hevitra ny hanaovana vaksiny faobe ny zaza rehetra latsaky ny 15 taona. Raha vita vaksiny daholo mantsy ny zaza dia tsy misy atahorana intsony ny hisian’ io aretina io eto amintsika. Entina hiarovana ny taranaka faramandimby izany ny vaksiny ary io sy ny fahadiovana no  fiadiana tsara indrindra amin’ireo aretina rehetra izay azo sorohina aminy vaksiny. Soa aza fa misy vaksiny ny “poliomyélite” ka manana adidy isika rehetra hifanentana amin’izany. Tsara ho fantatra koa fa ny famerenana ny vaksiny dia mampitombo ny hery fiarovana ao amin’ny zaza. Koa manao antso avo aminy olom-pirenena, ireo mpitsabo rehetra ary ny ray aman-dreny rehetra ny Holafitry ny dokotera mba hiara-hanentana amin’ny fanaovana vaksiny ny zaza ho fiarovana ny taranaka. Aleo tokoa mantsy misoroko toy izay mitsabo hoy ny ohabolantsika. »