Tovolahy miisa 3 vao 16 taona sy 15 taona no nadoboky ny fitsarana ao Ambalatavoahangy, any Toamasina, noho ny raharaha sinto-mahery tany an-toerana. Ny mpandalo eo amin’ny Epp « La foire » no lasibatr’izy ireo ny harivan’ny alahady 22 novambara lasa teo, ka najifa tamin’izany ny vola sy ny finday an’ireo olona ireo. Noho ny ezaky ny fokonolona sy ny mpitandro filaminana anefa dia voasambotra ny androtr’io ihany ny iray tamin’izy ireo. Taorian’ny famotorana natao an’ity mpanendaka ity no nanorony ireo namany mpiray tsikombakomba aminy ka niakatra fitsarana avy hatrany izy ary nampidirina am-ponja vonjimaika avy eo. Tsy nijanona teo anefa fa nitohy ny fikarohana nataon’ny polisy ireo namany ireo ka sarona ny andron’ny alarobia teo ireo roa lahy ka natolotra ny mpitsara mpanao famotorana ihany koa ary niditra ao am-ponjan’Ambalatavoahangy.

L.N