Nahitana taolana iray gony tao ambany tetezan’i Ranomainty, ao an-tampon-tananan’i Mahanoro, ny 27 novambra lasa teo. Olona sendra nandalo no nahatsikaritra kitapo nampiahiahy azy ka rehefa nojerena dia taolan-dava miisa 14 no hita tao anatiny. Nampandre ny mpitandro filaminana avy hatrany ireo nahita izany ka nidina teny an-toerana ireo voalohany nanao ny fizahana. Tsy fantatra ny nahavanon-doza sy ny tompon’ny razana voaviravira hatreto. Tsy nisy fitairanana fasana vaky ihany koa tany an-toerana.

Noraisin’ny manam-pahefana an-tanana ny andraikitra ka nalevina ao amin’ny fasam-bahiny ao an-toerana ihany ireo taolana. Araka ny vaovao voaray, betsaka ny toerana ahitana taolam-paty mifatratra anaty gony any amin’iny faritra Atsinanana iny amin’izao fotoana izao. Tsapa ihany kao fa tsy avy any an-toerana ireo taolana hita ireo fa avy aty amin’ny faritra ivelany satria tsy mbola nisy mihitsy ny fitarainana vaky fasana voaray manodidina ireo toerana nahitana ireo taolana ireo.