Mbola olana lehibe eto Madagasikara ny tsy fahampian’ny rano fisotro madio fa indrindra eny amin’ny tontolo ambanivohitra. Araka ny tatitra ny Diorano Wash 2012-2016, mbola ambany ny tahan’ny fahazoana izany satria 43 isan-jaton’ny mponina ihany hatreto no mahazo izany ary ny 40 isan-jato no manana lavapiringa. Manoloana izay indrindra dia nanantanteraka fivoriam-be naharitra roa andro, ny voalohany sy ny faharoa ny volana desambra, teny amin’ny trano fandraisam-bahiny Astauria, eny Antanimena, nivondronan’ireo mpisehatra rehetra ao anatin’ny fikambanana Diorano Wash ato amin’ny faritra 22 niaraka amin’ny Water Aid mba ametrahana ny fiaraha-monim-pirenena momba ny rano, ny fahadiovana ary ny fidiovana izay tafiditra anatin’ny fampandrosoana ny firenena sy ametrahana ny fitondrana tsara tantana. « Tanjona ny fampiroboroboana ny fandraisana anjara ny  vehivavy sy ny tanora amin’ny fitantanana sy ny fampandrosoana ny rano, fahadiovana, fidiovana », hoy i Herivelo Rakotondrainibe, mpandrindra nasionaly ny Diorano Wash. Nisy noho izany ny jery todika sy ny fandrosoana soso-kevitra hanatsarana ny fahadiovana izay nezahina natsangana nandritra ny fivoriam-be.

Laurena Nany